Американскиот претседател Доналд Трамп во интервју за Фокс њуз изјави дека Иран може да воспостави контакт со САД доколку сака да преговара за завршување на војната.
Тој истакна дека, како што рече, постојат отворени комуникациски канали и дека Техеран може да се обрати директно до Вашингтон. Трамп додаде дека ја откажал планираната посета на неговите специјални пратеници Стив Виткоф и Џаред Кушнер во Исламабад, каде што престојува иранскиот министер за надворешни работи Абас Арагчи.
Американскиот претседател изрази уверување дека конфликтот со Иран ќе заврши во краток рок и дека САД ќе излезат како победници, нагласувајќи дека, според него, Исламската Република нема да продолжи со развојот на својата нуклеарна програма.
Трамп истовремено упати критики кон сојузниците во НАТО, оценувајќи дека не даваат доволна поддршка на САД. Како пример ја наведе Велика Британија, наведувајќи дека нејзините најави за поддршка доаѓаат предоцна.
Тој додаде и дека имал, како што рече, „многу добри разговори“ со рускиот претседател Владимир Путин и со украинскиот претседател Володимир Зеленски, посочувајќи дека се работи на изнаоѓање решение и за војната во Украина.
