Трамп: Иран гарантира дека нема да развива ниту да купува нуклеарно оружје

Американскиот претседател Доналд Трамп изјави дека Иран дал гаранции оти нема да развива ниту да набавува нуклеарно оружје, оценувајќи дека Вашингтон постепено ги добива клучните отстапки што ги бара во тековните преговори со Техеран.

Изјавата доаѓа во време кога двете страни продолжуваат интензивни разговори за ставање крај на конфликтот и решавање на спорните прашања поврзани со иранската нуклеарна програма.

— реклама —

Во интервју за „Фокс њуз“, Трамп рече дека од иранска страна добил уверувања дека земјата нема да дојде до нуклеарно оружје на кој било начин.

„Единствената гаранција што ми е потребна е да нема нуклеарно оружје. Тие се согласија со тоа. На почетокот рекоа дека нема да развиваат нуклеарно оружје. Потоа прашав што ако решат да го купат. Сега велат дека нема ниту да развиваат ниту да купуваат оружје на кој било начин“, изјави Трамп.

— реклама —

Според американските медиуми, Белата куќа испратила нова верзија на предлог-договорот до Техеран, со дополнителни измени и построги услови, особено во делот на контролата на нуклеарниот материјал.

— реклама —

Во меѓувреме, американскиот министер за одбрана Пит Хегсет предупреди дека САД се подготвени и за воено сценарио доколку преговорите не дадат резултат.

Паралелно со дипломатските активности, продолжуваат тензиите и околу Ормутскиот Теснец, еден од најважните светски коридори за транспорт на нафта и гас. Според извештаите, Иран го ограничил поморскиот сообраќај низ теснецот, додека САД продолжуваат со мерките насочени кон иранските пристаништа и бродови.

Дополнителни тензии предизвика и соопштението на Исламската револуционерна гарда дека бил соборен американски дрон MQ-1 во близина на иранските територијални води.

Меѓу клучните барања на Техеран во преговорите останува деблокирањето на замрзнатите ирански средства во странство. Според иранските државни медиуми, актуелниот нацрт-договор предвидува ослободување на околу 12 милијарди долари во рок од два месеца.