Трамп: Испраќаме воени бродови во Ормутскиот теснец, се надевам дека ќе ни се приклучат Кина, Франција и Јапонија

Американскиот претседател Доналд Трамп изјави дека повеќе земји, заедно со САД, ќе испратат воени бродови за да обезбедат Ормутскиот теснец да остане отворен за пловидба.

Во објава на социјалната мрежа „Трут Соушал“, Трамп наведе дека државите кои би биле погодени од обидот на Иран да го затвори овој важен поморски премин ќе испратат свои бродови во регионот.

— реклама —

„Многу земји, особено оние кои би биле погодени од обидот на Иран да го затвори Ормутскиот теснец, ќе испратат воени бродови заедно со САД за теснецот да остане отворен и безбеден“, напиша Трамп.

Тој изрази очекување дека на операцијата ќе ѝ се приклучат и други големи држави, меѓу кои Кина, Франција, Јапонија, Јужна Кореја и Обединетото Кралство.

— реклама —

„Веројатно Кина, Франција, Јапонија, Јужна Кореја, Обединетото Кралство и други земји ќе испратат бродови во таа област за Ормутскиот теснец повеќе да не биде под закана“, додаде тој.

Во објавата Трамп тврдеше и дека САД ги уништиле иранските воени капацитети.

— реклама —

„Веќе уништивме 100 проценти од иранските воени капацитети“, напиша Трамп, додавајќи дека Иран сепак би можел да се обиде да испрати беспилотни летала, мини или ракети во регионот.

Тој најави дека американските сили ќе продолжат со воените операции.

— реклама —

„Во меѓувреме, САД ќе го бомбардираат брегот и ќе продолжат да потопуваат ирански бродови и чамци“, напиша Трамп.

Според него, „на овој или на оној начин“, Ормутскиот теснец наскоро ќе биде „отворен, безбеден и слободен“.