Трамп ја испрашувал кралицата Елизабета за принцот Хари

Американскиот претседател Доналд Трамп, за време на државната посета на Обединетото Кралство во 2019 година, наводно во повеќе наврати ја испрашувал британската кралица Елизабета II за нејзиното мислење за принцот Хари и неговата сопруга Меган Маркл, се наведува во книгата на Сузан Пејџ.

— реклама —

Во делото „Кралицата и нејзините претседатели: Скриената рака што ја обликуваше историјата“, авторката ги опишува односите на кралицата со американските претседатели низ децениите – од нејзината прва средба со Хари Труман во 1951 година, до државната вечера организирана во чест на Трамп во 2019 година, пренесува The Independent.

— реклама —

Според извадоците од книгата, Трамп се обидувал да добие информации за наводни тензии во британското кралско семејство, но кралицата избегнувала да изнесе негативни ставови. Таа, како што се наведува, одговарала дека сите се „многу добри“, и покрај неговото инсистирање да открие што навистина мисли.

Трамп, според авторката, изразил и став дека кралицата била повредена од односот кон неа, алудирајќи на наводна непочит од страна на Хари и Меган. Дополнително, тој се обидел да дознае кој ѝ бил омилен американски претседател, но добил дипломатски одговор дека „сите биле добри“.

— реклама —

И покрај тоа, Трамп заклучил дека токму тој ѝ бил омилен, тврдејќи дека имале добра меѓусебна комуникација – оценка што, според книгата, не ја делат некои други американски политичари, меѓу кои и Хилари Клинтон, која изразила сомнеж во таквите тврдења.

— реклама —

Книгата ќе биде објавена од издавачката куќа Harper и треба да излезе од печат на 14 април.