Кремљ ги отфрли обвинувањата на американскиот претседател Доналд Трамп дека Русија претставува закана за изборниот процес во САД, оценувајќи дека тие се темелат на непроверени информации од американските разузнавачки служби.
Портпаролот на Кремљ, Дмитриј Песков, изјави дека Трамп се повикува на „неидентификувани и непотврдени информации“ и потсети дека, според него, американските истраги не утврдиле дека Москва влијаела врз изборите во САД.
„Сите истраги што ги спроведоа американските власти заклучија дека Русија на никаков начин не влијаела врз изборите во Соединетите Американски Држави“, изјави Песков, пренесе руската агенција РИА Новости.
Неговата реакција следува откако Белата куќа објави документи од кои е симната ознаката за тајност, а кои се однесуваат на можни странски влијанија врз американскиот изборен процес, безбедносните слабости на изборниот систем и претходни процени на американските разузнавачки служби.
Според Белата куќа, документите укажуваат на ранливости во изборната инфраструктура пред претстојните избори за Конгресот, но нивното објавување нема цел повторно да ги оспорува резултатите од претходните избори, туку да придонесе за подобра заштита на изборниот процес.
Во документите, како што пренесува Си-Ен-Ен, се наведува дека американските разузнавачки служби процениле дека Русија, Кина, Иран и Северна Кореја поседуваат капацитети за пристап до одредени изборни бази на податоци, како што се централизираните регистри на избирачи.
Во исто време, претходните американски разузнавачки процени, како и извештајот на Сенатскиот комитет за разузнавање, наведуваат дека не се пронајдени докази за промена на гласовите, манипулација со гласачките машини или директно влијание врз резултатите од изборите.
Сепак, во процената од 2017 година се наведува дека Русија спровела кампања за влијание за време на претседателските избори во 2016 година, додека во анализата за изборите во 2020 година се оценува дека Москва се обидувала да му наштети на угледот на тогашниот кандидат Џозеф Бајден и да му даде поддршка на Доналд Трамп, без докази дека бил изменет изборниот резултат.
