Администрацијата на американскиот претседател Доналд Трамп официјално ја предупредила Украина да ги запре нападите врз бродови во Црното Море кои не се во руска сопственост, објави „Киев пост“.
Дипломатското предупредување било испратено по серијата напади со беспилотни летала врз танкери во близина на руското пристаниште Новоросијск, при што бил погоден и брод изнајмен од американската енергетска компанија „Шеврон“.
Според „Волстрит журнал“, предупредувањето следело по средбата меѓу извршниот директор на „Шеврон“, Мајк Вирт, други претставници на нафтената индустрија и високи функционери на американската администрација. На состанокот било побарано да се обезбеди заштита за нафтените операции на компанијата во Казахстан.
Американски претставник изјавил дека Вашингтон смета оти нападите врз бродови што не се руски се неприфатливи, нагласувајќи дека Каспискиот нафтоводен конзорциум (CPC) е од клучно значење за транспортот на казахстанската нафта кон европските пазари и претставува важна алтернатива на руските енергенси.
Новоросијск е главниот извозен терминал на Каспискиот нафтоводен конзорциум, преку кој се транспортираат околу два проценти од дневното светско производство на сурова нафта. „Шеврон“ поседува 15 проценти удел во конзорциумот и има значителни инвестиции во најголемото казахстанско нафтено поле Тенгиз.
Иако нафтоводот и производствените капацитети не биле директно оштетени, нападите довеле до ограничувања при товарењето на сурова нафта во Новоросијск, поради што Казахстан бил принуден привремено да го намали производството.
Во меѓувреме, украинската војска продолжува со нападите врз руската логистичка и енергетска инфраструктура во Црното Море. Генералштабот на украинските вооружени сили потврди напад врз танкер за кој тврди дека превезувал руска нафта и гориво за руската армија.
Според командантот на украинските сили за беспилотни системи, Роберт „Маѓар“ Бровди, во последните денови биле погодени повеќе руски бродови и енергетски објекти на окупираниот Крим, како дел од поширока операција насочена кон слабеење на руската воена и логистичка инфраструктура.
