Трамп: Кој ќе победи во вештачката интелигенција – победува, дата центрите не смеат да заминат во Кина

Американскиот претседател Доналд Трамп повторно застана во одбрана на изградбата на дата центри во САД, предупредувајќи дека блокирањето на ваквите инвестиции може да ѝ даде предност на Кина во глобалната трка за вештачка интелигенција.

На предизборен собир во Вандалија, Охајо, Трамп порача дека дата центрите можат да донесат големи инвестиции во сојузната држава и дека САД не треба да дозволат проектите да бидат пренасочени кон Кина.

— реклама —

„Толку многу пари можат да се заработат за Охајо. Не можете едноставно да ги исклучите. Тие ќе одат во Кина“, рече Трамп.

Дата центрите станаа значајна политичка тема во Охајо пред изборите, особено поради загриженоста на дел од населението околу нивната огромна потрошувачка на електрична енергија, користењето земјиште и можните последици врз сметките за струја.

— реклама —

Трамп, сепак, смета дека тие се неопходна инфраструктура за развојот на вештачката интелигенција и дека нивното одбивање би значело губење инвестиции и технолошка предност.

— реклама —

Американскиот претседател ја опиша технологијата како „суперинтелигенција“ и оцени дека натпреварот во вештачката интелигенција во суштина се води меѓу САД и Кина.

„Ние водиме пред Кина во вештачката интелигенција, а кој ќе победи во вештачката интелигенција – победува. Тоа е моќта. Ова е поголемо од интернетот, ова е револуција“, порача Трамп.

— реклама —

Тој ја поддржа и иницијативата дата центрите да не предизвикуваат зголемување на трошоците за електрична енергија за домаќинствата, односно технолошките компании да ги покриваат дополнителните инфраструктурни трошоци поврзани со нивното работење.

Дебатата околу дата центрите во САД се засилува паралелно со експлозивниот развој на вештачката интелигенција. Огромната компјутерска моќ потребна за развој и работа на напредните модели бара изградба на нови центри и значително поголеми количини електрична енергија, додека локалните заедници сè почесто бараат гаранции дека трошоците нема да бидат префрлени врз граѓаните.