Американскиот претседател Доналд Трамп ги отфрли повиците за забавување на развојот на вештачката интелигенција, оценувајќи дека зад предупредувањата за нејзините ризици стојат „многу негативни сили“. Неговата изјава доаѓа откако директорот на „Антропик“, Дарио Амодеи, повика компаниите да го забават унапредувањето на најмоќните модели за да има повеќе време за справување со безбедносните ризици.
Амодеи предложи план во три чекори – независни евалуатори со пристап до системите на компаниите, координација меѓу водечките компании за воспоставување безбедносни стандарди и меѓународна соработка во управувањето со ризиците од вештачката интелигенција.
Неговиот повик доби поддршка од директорот на „Опенаи“, Сем Алтман, и Елон Маск, кој ја предводи „ИксАИ“. Алтман порача дека идејата за независни евалуатори е одлична и дека „Опенаи“ ќе примени сличен пристап.
Амодеи својот предлог го објави по извештај на „Антропик“ за злоупотреба на нејзините модели „Клод“ во активности поврзани со развој на оружје, сајбероперации, надзор и измами. Тој предупреди и дека брзото унапредување на системите би можело да ја надмине човечката способност за нивно разбирање и контрола.
Трамп, сепак, смета дека САД мора да ја задржат предноста пред Кина во оваа област.
„Ние ја предводиме Кина во вештачката интелигенција. Ние сме најсофистицираната земја во светот и искрено сакам да остане така, затоа што кој и да победи во вештачката интелигенција, победува“, изјави Трамп.
Тој додаде дека може да се постават одредени „заштитни огради“, но истовремено ги критикуваше оние кои, според него, отвораат сценарија што нема да се случат.
Дебатата за ризиците од вештачката интелигенција дополнително се засили по предупредувањата од истражувачи дека брзиот развој на технологијата би можел да создаде сериозни закани за човештвото. Во исто време, дел од технолошките компании и нивните раководители сè погласно бараат поголеми безбедносни мерки.
Амодеи истовремено повика САД да ги зајакнат контролите за извоз на најнапредни чипови кон Кина и предупреди на можноста кинески лаборатории да користат техники за преземање знаење од постоечки модели.
Кинескиот државен медиум „Глобал тајмс“, пак, го оцени неговиот предлог како обид преку технолошки ограничувања и регулаторни мерки да се ограничи развојот на вештачката интелигенција во Кина и да се задржи американската предност во оваа област.
Спорот покажува дека прашањето за иднината на вештачката интелигенција сè повеќе станува и геополитичко прашање, во кое безбедноста, технолошкиот развој и натпреварот меѓу САД и Кина се тесно поврзани.
