Американскиот претседател Доналд Трамп направи неочекувана промена за време на враќањето од Самитот на НАТО во Турција. Од Анкара до британската воздухопловна база RAF Милденхол тој патувал со постариот авион „Ер Форс Уан“, а потоа се префрлил во новиот претседателски авион, донација од Катар, со кој го продолжил летот кон Вашингтон.
Трамп на социјалната мрежа Truth Social објави дека одлуката да лета со постариот авион ја донел „од носталгија“, додека новиот авион во меѓувреме бил изложен за американските војници стационирани во британската база.
Новиот претседателски авион е преработен „Боинг 747“, обоен во црвена, бела, темносина и златна боја, според изборот на Трамп. Леталото минатата година му беше донирано на САД од Катар, а неговата модернизација ја изврши американската компанија „L3Harris Technologies“.
Запрашан дали промената на авионот е поврзана со можни закани за неговата безбедност, Трамп не даде директен одговор, но призна дека таква опасност постои.
„Јас сум прв на иранската листа за ликвидација. Не знам… Не можам да ви кажам, но, искрено, не ми е грижа“, изјави американскиот претседател по завршувањето на самитот.
Новото летало веќе предизвика реакции во САД. Дел од експертите изразија загриженост дека авионот можеби не ги поседува сите безбедносни системи со кои располага сегашниот „Ер Форс Уан“, како заштита од прислушување и противракетна одбрана.
Во меѓувреме, „Боинг“ продолжува со изработката на новата генерација претседателски авиони, чија испорака доцни неколку години. Според сегашните проценки, новите авиони нема да бидат испорачани пред средината на 2028 година, а трошоците за програмата веќе надминале пет милијарди долари.
