Трамп му дава шанса на дипломатското решение, Венс посредува во разговорите со Техеран

Американскиот потпретседател Џеј Ди Венс во изминатите две недели бил непосредно вклучен во посредничките разговори со Иран, чија цел е постигнување ново примирје и продолжување на преговорите за нуклеарната програма, објави „Аксиос“, повикувајќи се на два извора запознаени со разговорите.

— реклама —

Според нив, Венс речиси секојдневно разговарал со катарскиот премиер шеикот Мохамед бин Абдулрахман Ал Тани, началникот на пакистанскиот Генералштаб, фелдмаршалот Асим Мунир, како и со други посредници. Во процесот се вклучени и американскиот специјален пратеник Стив Виткоф и Џаред Кушнер, зет и советник на претседателот Доналд Трамп.

Венс со катарските и пакистанските посредници ја разгледувал можноста во наредните денови да се одржи техничка средба меѓу американски и ирански претставници, но таа сè уште не е реализирана. Трамп засега е подготвен да им даде простор на дипломатските напори за да се утврди дали може да се постигне договор.

— реклама —

Пред две недели Венс испратил писмо до секретарот на иранскиот Врховен совет за национална безбедност, Мохсен Резаи, со предлог за продолжување на директните преговори. Иранските претставници оцениле дека писмото придонело за создавање поповолна атмосфера за обновување на разговорите.

— реклама —

Изворите вклучени во посредувањето велат дека има напредок, но дека тој е бавен. Катарскиот премиер во петокот изјавил дека неговата земја соработува со американските претставници за намалување на тензиите, со поддршка од, како што навел, „мудри гласови во Техеран“. Тој потврдил дека разговорите со администрацијата на Трамп продолжиле и по меѓуизборите, иако со послаб интензитет.

Во петокот Трамп разговарал и со катарскиот емир шеикот Тамим бин Хамад Ал Тани за напорите на Доха да ги приближи ставовите на Вашингтон и Техеран. Емирот ја нагласил важноста на дијалогот и дипломатското решавање на споровите за да се спречи понатамошна ескалација и да се зачуваат слободата на пловидбата и безбедноста на енергетското снабдување.

— реклама —

Сепак, дипломатските напори продолжуваат во услови на воени тензии. Американската војска во петокот нападнала лансирен систем за противвоздушни ракети на иранскиот остров Кешм во Ормускиот Теснец, откако од него била истрелана ракета кон американски борбен авион. Нападот го потврдил и Трамп.