Американскиот претседател Доналд Трамп најави воведување на, како што го опиша, „најразорната економска операција“ досега преземена против една земја, со која Вашингтон има намера дополнително да го изолира Иран.
Трамп предупреди дека и државите кои финансиски или на друг начин ќе му помагаат на Иран ќе се соочат со „огромни економски последици“.
Во објава на социјалната мрежа Truth Social, американскиот претседател порача дека Иран имал можност да постигне договор со САД, но дека не ја искористил. Тој најави економска војна и изолација од, како што рече, невидени размери.
Новите мерки, според Трамп, ќе бидат насочени кон шверцот на нафта, финансиските трансакции, трансферите на готовина, менувачниците, регистрите на бродови и компаниите кои служат како параван. Тој побара овие активности веднаш да престанат.
Трамп истовремено ги повика американските сојузници да ѝ се придружат на САД во притисокот врз Техеран, нарекувајќи ја операцијата „економски ден Д“.
Американскиот претседател повторно порача дека Иран „никогаш нема да има нуклеарно оружје“.
