Трамп му се закани на Иран: „Ќе живеете во пекол“ ако не го отворите Ормускиот теснец

Американскиот претседател Доналд Трамп му се закани на Иран дека „ќе живее во пекол“ доколку до вторник не се постигне договор за повторно отворање на Ормускиот теснец, клучна поморска рута низ која минува околу една петтина од светската нафта.

— реклама —

Во објава на социјалната мрежа Truth Social, Трамп порача дека времето истекува, што е најнова во низата закани откако САД и Израел кон крајот на февруари започнаа напади врз Иран. Како одговор на тие напади, Техеран практично го затвори Ормускиот теснец, со што сериозно се наруши снабдувањето на глобалниот енергетски пазар.

Од почетокот на конфликтот, Трамп повеќепати ги менува роковите за постигнување договор со Иран. Првата закана ја упати на 21 март, кога најави дека САД ќе „нападнат и уништат“ ирански енергетски објекти ако теснецот не биде отворен во рок од 48 часа.

— реклама —

Подоцна, роковите беа неколкупати продолжувани – прво за пет дена, по, како што рече, „продуктивни разговори“, а потоа и за дополнителни десет дена, при што новиот краен рок беше поставен на 6 април.

— реклама —

На почетокот на април, Трамп тврдеше дека Техеран побарал прекин на огнот, но иранското Министерство за надворешни работи го демантираше тоа. Во меѓувреме, американскиот претседател изјави дека САД „лесно“ би можеле да го отворат теснецот доколку добијат „уште малку време“.

Во последната порака, тој повторно ја засили реториката: „Времето истекува – 48 часа пред да се соочат со пекол“, напиша Трамп, истовремено вршејќи притисок врз европските сојузници да се вклучат во напорите за отворање на пловниот пат.

Ормускиот теснец е една од најважните енергетски артерии во светот, а неговата блокада веќе има значително влијание врз глобалните пазари на нафта и гас.