Трамп му се закани на Иран: Следната недела ќе ви ги уништиме мостовите и електраните

Американскиот претседател Доналд Трамп упати нови закани кон Иран, предупредувајќи дека САД следната недела ќе ги нападнат мостовите и електраните доколку Техеран не се врати на преговарачката маса. Изјавата доаѓа во момент кога четврти ден по ред продолжуваат меѓусебните напади меѓу двете земји.

„Следната недела за нив ќе биде многу лоша. Ќе ги уништиме сите нивни електрани. Ќе ги уништиме сите нивни мостови ако не седнат на преговарачка маса и не почнат да преговараат“, изјави Трамп во интервју за „Фокс њуз“.

— реклама —

Претходно, Трамп се откажа од најавената такса од 20 проценти за целиот товарен поморски сообраќај низ Ормускиот Теснец, но истовремено повторно воведе американска поморска блокада на иранските пристаништа.

Заканите предизвикаа реакции и од Обединетите нации. Високиот комесар на ОН за човекови права, Волкер Турк, потсети дека според меѓународното право намерните напади врз цивилна инфраструктура, како што се мостови и електрани, може да претставуваат воено злосторство. Женевските конвенции забрануваат напади врз објекти што се клучни за цивилното население.

— реклама —

Американската Централна команда (CENTCOM) соопшти дека извела нов бран напади врз Иран со цел да ги намали неговите капацитети за напади врз комерцијалниот поморски сообраќај во Ормускиот Теснец. Според американскиот адмирал Бред Купер, Иран нападнал седум трговски бродови, при што загинале, исчезнале или биле повредени речиси десет членови на цивилни екипажи.

— реклама —

Во меѓувреме, Иран соопшти дека нападнал американски воени објекти во Бахреин и Јордан. Кувајтската армија објави дека пресретнала ирански беспилотни летала, додека во Бахреин биле активирани сирени за воздушна опасност.

Иранската Револуционерна гарда потврди дека нападнала два танкера на Обединетите Арапски Емирати, тврдејќи дека тие ги игнорирале предупредувањата и пловеле низ забранета рута. Според властите во Емиратите, во нападите загинал еден индиски морнар, а осум лица биле повредени.

— реклама —

Ормускиот Теснец останува една од најчувствителните точки во конфликтот. Станува збор за клучен светски поморски коридор низ кој минува значителен дел од глобалниот извоз на нафта. Поради новата ескалација, танкерскиот сообраќај е значително намален, а цените на нафтата повторно бележат раст.

Трамп изјави дека се откажал од идејата за воведување такса за пловидба низ теснецот по разговорите со лидерите на земјите од Заливот, најавувајќи наместо тоа големи трговски и инвестициски договори со нив. Од друга страна, Техеран порача дека нема да попушти под воен и економски притисок и дека ќе ја задржи контролата врз Ормускиот Теснец.