Американскиот претседател Доналд Трамп присуствуваше на вечерата на дописниците на Белата куќа, која оваа година беше одржана три месеци подоцна од планираното, поради априлскиот вооружен инцидент пред хотелот каде што требаше да се одржи настанот.
За време на едночасовниот говор, Трамп главно се обрати во шеговит тон, но истовремено упати критики кон медиумите кои ги нарече „медиуми на лажни вести“, како и кон дел од новинарите и политичките противници.
Тој оцени дека медиумите во голема мера зависат од неговото присуство во јавноста.
„Кога ќе си заминам, сите ќе банкротирате. Вашиот бизнис модел ќе заврши“, изјави Трамп, по што накратко стави капа со натпис „Трамп 2028“.
Трамп во говорот се пошегува и со новинарите кои носеле заштитни елеци поради зголемените безбедносни мерки.
„Знам дека не било лесно да најдат чевли што одговараат со панцирите, кои многумина не сакале да ги носат затоа што повеќе би сакале да умрат отколку да изгледаат 20 килограми потешки“, рече тој.
Тој се пошегува и на сметка на американскиот министер за здравство Роберт Ф. Кенеди Младиот, познат како РФК Младиот, коментирајќи ја вечерата и храната што била послужена.
Претседателката на Здружението на дописници на Белата куќа, Вејџија Џијанг, порача дека постои разлика меѓу критиката кон медиумите и обидите за нивно поткопување.
„Едното е здраво и нè прави подобри, а другото е токму она што основачите сакаа да го спречат“, изјави таа.
Организаторите соопштија дека годинава биле воведени построги безбедносни мерки, а гостите морале да поминат повеќекратни проверки за да влезат на настанот.
Ова беше првпат Трамп да одржи говор на вечерата на дописниците на Белата куќа во текот на неговите два претседателски мандати, откако во првиот мандат го бојкотираше настанот и често ги критикуваше медиумите.
