Иранскиот министер за надворешни работи, Абас Арагчи, го критикуваше најавениот план на американскиот претседател Доналд Трамп за засилен економски притисок врз Техеран, оценувајќи дека станува збор за продолжување на „политика осудена на пропаст“.
Арагчи на социјалната мрежа „Икс“ порача дека таканаречениот „економски ден Д“ има цел да го пренасочи вниманието од економските проблеми со кои, според него, се соочуваат САД.
„Продолжувањето на политиките осудени на пропаст само ќе доведе до нови порази и непријателство кон Иранците“, напиша иранскиот министер. Тој истовремено го обвини Вашингтон дека со својата политика претставува закана за меѓународната економија и суверенитетот на државите.
Трамп вчера преку својата мрежа „Truth Social“ најави „најголема економска операција против една земја во историјата“ и зборуваше за „досега невидена економска војна“, но не откри конкретни детали за мерките што ги разгледува Вашингтон. Американскиот претседател исто така се закани со „страшни“ економски последици за секоја земја што ќе му помага на Иран.
Тензиите меѓу Техеран и Вашингтон дополнително се продлабочија по израелско-американските воздушни напади од 28 февруари, на кои Иран возврати со напади врз земји во регионот кои се сојузници на САД. Во меѓувреме, преговорите се во застој.
Иран и натаму го блокира Ормускиот Теснец, стратешкиот поморски коридор низ кој пред почетокот на конфликтот минувала околу една петтина од светската нафта. Неговото повторно отворање е меѓу приоритетите на САД, кои во меѓувреме воведоа блокада на иранските пристаништа.
Трамп веќе подолг период ја спроведува политиката на „максимален притисок“ врз Иран преку економски санкции. Мерките повторно беа воведени по неговото враќање во Белата куќа во јануари 2025 година, продолжувајќи ја политиката што ја применуваше и за време на првиот претседателски мандат.
