Трамп најави нови преговори со Иран: Го откажавме најголемиот напад од Втората светска војна

Американскиот претседател Доналд Трамп соопшти дека денеска попладне ќе започнат нови преговори меѓу САД и Иран, откако, како што рече, ја откажал планираната голема воена операција против Техеран.

Трамп изјави дека Иран и неколку американски сојузници од Блискиот Исток побарале одложување на нападот, бидејќи веруваат дека е можен договор.

— реклама —

„Сè беше подготвено. Побараа да почекаме затоа што сметаат дека може да се постигне договор. Има напредок околу Ормускиот Теснец, а ќе има и околу нуклеарната програма“, изјави Трамп пред новинарите.

Тој додаде дека барањето за одложување дошло од саудискиот престолонаследник Мохамед бин Салман, како и од партнерите на САД од Обединетите Арапски Емирати и Катар. Сепак, не прецизира каде ќе се одржат разговорите, ниту кои претставници ќе учествуваат во нив.

— реклама —

Од друга страна, Иран засега официјално не ги потврди тврдењата на американскиот претседател. Полуофицијалната новинска агенција „Мехр“ објави дека Техеран не побарал одложување на американските воени активности и ги оцени изјавите на Трамп како „уште една лага“.

Во исто време, иранските медиуми ја пренесоа изјавата на министерот за надворешни работи Абас Арагчи, според која преговорите со Оман за договор поврзан со Ормускиот Теснец се во завршна фаза.

— реклама —

По најавата за новите разговори, цените на нафтата забележаа пад на светските берзи. Цената на суровата нафта „брент“ се намали за 4,5 проценти, додека американската сурова нафта поевтини за 4,6 проценти.

Ормускиот Теснец останува една од најважните светски поморски рути, бидејќи низ него поминуваат околу 20 проценти од глобалниот извоз на сурова нафта и течен природен гас.

Трамп изјави и дека планираните американски удари ќе биле „најголеми од Втората светска војна“, но нагласи дека одлучил да ги откаже за да им се даде шанса на дипломатските напори.

Во меѓувреме, од иранска страна повторно беше порачано дека секоја закана ќе биде сфатена сериозно и дека земјата е подготвена да одговори доколку биде нападната.