Американскиот претседател Доналд Трамп изрази уверување дека конфликтот со Иран би можел наскоро да заврши, додека Техеран го разгледува американскиот мировен предлог кој, според медиумски извори, формално би ставил крај на војната, без целосно да бидат решени клучните барања на Вашингтон.
Според извори на „Ројтерс“, предлогот предвидува меморандум од една страница што би означил официјален прекин на конфликтот, по што би следувале дополнителни разговори за повторно отворање на Ормутскиот теснец, укинување на американските санкции и ограничувања на иранската нуклеарна програма.
„Имавме многу добри разговори во последните 24 часа и можно е да постигнеме договор. Ова ќе заврши брзо“, изјави Трамп, кој претходно повторно се закани со бомбардирање доколку не биде постигнат договор.
Портпаролот на иранското Министерство за надворешни работи најави дека Техеран наскоро ќе го соопшти својот официјален одговор, додека иранскиот пратеник Ебрахим Резаи оцени дека американскиот предлог повеќе личи на „листа на желби отколку на реален договор“.
Спикерот на иранскиот парламент Мохамед Багер Галибаф ги отфрли наводите дека двете страни се блиску до компромис, оценувајќи дека станува збор за американско „спинување“ по неуспешниот обид за повторно отворање на Ормутскиот теснец.
Американскиот портал Аксиос објави дека Белата куќа очекува одговор од Иран во следните 48 часа за неколку клучни точки од предлогот. Во сегашната форма, документот би означил прекин на воените дејствија и почеток на 30-дневен период на преговори за подетален договор.
Информациите за можен напредок во преговорите влијаеја и врз светските пазари. Цената на нафтата падна на најниско ниво во последните две недели, додека берзанските индекси забележаа раст поради очекувањата за стабилизација на состојбата на Блискиот Исток.
