Трамп: Не му даваме 300 милијарди долари на Иран, тоа се лажни вести

Американскиот претседател Доналд Трамп ги отфрли тврдењата дека Вашингтон обезбедува финансиска помош за Иран, оценувајќи дека станува збор за „лажни вести“ во екот на извештаите за можен фонд за обнова вреден стотици милијарди долари.

„Приказната дека САД му плаќаат на Иран 300 милијарди долари е лажна вест“, напиша Трамп на својата социјална мрежа Truth Social. Сепак, не беше целосно јасно дали тој се осврнува на износот од 300 милиони или на значително поголемата сума од 300 милијарди долари, која претходно беше споменувана во медиумски извештаи.

— реклама —

Американскиот потпретседател Џеј Ди Ванс дополнително појасни дека евентуалниот фонд од 300 милијарди долари, доколку биде формиран, нема да се финансира од американските даночни обврзници.

— реклама —

„Ниту еден цент од тие средства не доаѓа од САД“, изјави Ванс за NBC News, додавајќи дека заливските сојузници би можеле да инвестираат во Иран само доколку Техеран создаде услови погодни за инвестиции и почне да се однесува како „нормална држава“.

Според високи американски претставници, секој можен финансиски пакет би бил строго условен со напредокот во спроведувањето на договорените обврски. Financial Times објави дека евентуалното формирање на фондот ќе зависи од постигнување конечен договор, продолжување на примирјето за дополнителни 60 дена и целосно повторно отворање на Ормутскиот Теснец.

— реклама —

Во меѓувреме, американската администрација најави дека целосниот текст на Меморандумот за разбирање меѓу САД и Иран ќе биде објавен во јавноста во следните 24 до 48 часа.

— реклама —

„Меморандумот ќе биде јавно достапен. Еден од нашите главни принципи во овој процес е целосната транспарентност“, изјави висок американски функционер.

Иако делови од договорот веќе беа претставени пред јавноста, официјалниот документ сè уште не е објавен и покрај тоа што, според двете страни, бил дигитално потпишан уште во неделата.