Трамп: Односите со Иран се нормализирани, Ормускиот теснец повторно се отвора

Американскиот претседател Доналд Трамп изјави дека Ормускиот теснец ќе биде целосно отворен за поморски сообраќај до петок, оценувајќи дека ситуацијата во регионот се движи во позитивна насока.

Говорејќи пред новинарите на маргините на Самитот на Г7 во францускиот град Евијан, Трамп рече дека бродовите веќе почнале повторно да се движат низ еден од најважните светски поморски премини.

— реклама —

„Добри работи се случуваат. Бродовите сега почнуваат да се движат. До петок ќе го имаме Ормускиот теснец целосно отворен“, изјави Трамп.

— реклама —

Во друштво на претседателот на Обединетите Арапски Емирати, шеикот Мохамед бин Зајед ал Нахјан, американскиот лидер истакна дека односите меѓу САД и Иран, според него, сега се нормализирани.

„Преминот ќе биде отворен без наплата на патарина и ќе биде целосно бесплатен по истекот на 60 дена. Кога трајно ќе се отвори, ќе биде бесплатен“, рече Трамп.

— реклама —

Тој најави и прес-конференција на која, како што рече, ќе ја прочита точната формулација на меморандумот за прекин на огнот со Иран, оценувајќи дека станува збор за „многу важен документ“.

Трамп претходно изјави дека меморандумот за разбирање со Иран јасно предвидува Техеран да не поседува нуклеарно оружје. Дополнително, посочи дека ја поддржува идејата договорот да биде доставен на разгледување во американскиот Конгрес.

Ормускиот теснец е еден од најзначајните поморски коридори во светот, низ кој поминува значителен дел од глобалниот извоз на нафта и течен природен гас, па секоја нестабилност во овој регион има директно влијание врз светските пазари и енергетската безбедност.