Американскиот претседател Доналд Трамп откажа 810 милиони долари од средства што претходно биле одобрени од Конгресот, соопшти Белата куќа.
Најголемиот дел од средствата, 567 милиони долари, биле наменети за услуги за бегалци, баратели на азил и други мигранти преку Министерството за здравство и социјални услуги. Дополнително, биле укинати 50 милиони долари за програми за помош на имигранти и странци, 70 милиони долари за меѓународни образовни програми и 56 милиони долари за програми поврзани со домувањето и урбаниот развој.
Од Белата куќа соопштија дека Трамп сака да ги искористи достапните механизми за намалување на, како што ја оцени администрацијата, „расипничката и штетна државна потрошувачка“.
Одлуката е спроведена преку постапка позната како „џебно поништување“, при која претседателот, пред истекот на фискалната година, го известува Конгресот дека нема да ги искористи средствата што тој ги одобрил. Фискалната година завршува во среда.
Републиканската сенаторка Сузан Колинс изјави дека законодавците биле информирани за одлуката без претходни консултации. Таа оцени дека станува збор за незаконско укинување на средства одобрени со закон и потсети дека Канцеларијата за отчетност на Владата и претходно ја оценила ваквата практика како незаконска.
Администрацијата на Трамп истата постапка ја искористи и минатата година за укинување на 4,9 милијарди долари одобрени за странска помош.
Врховниот суд ѝ дозволи на администрацијата да ги укине тие средства, но не донесе конечна одлука за суштината на случајот.
