Американскиот претседател Доналд Трамп изнесе нови детали за соборувањето на американски воен хеликоптер „Апачи“, за кое директно го обвини Иран.
Во интервју за „Фокс њуз“, Трамп изјави дека ирански дрон што го погодил хеликоптерот „се заглавил меѓу двајцата пилоти“. Според него, леталото се запалило, но не експлодирало, по што пилотите успеале да го спуштат хеликоптерот во вода.
„Тоа што преживеаја е вистинско чудо“, рече Трамп, осврнувајќи се на спасувањето на двајцата членови на екипажот.
Станува збор за хеликоптер „Апачи“ кој патролирал во Ормускиот теснец, во близина на брегот на Оман. Извор запознаен со инцидентот изјавил за Си-Ен-Ен дека американскиот хеликоптер бил погоден од ирански дрон „Шахед“. Американски официјален претставник, кој сакал да остане анонимен, посочил дека сè уште не е утврдено дали дронот намерно го таргетирал хеликоптерот или станува збор за ненамерен инцидент.
Двајцата членови на екипажот биле спасени со помош на поморски дрон. Ова е прв загубен хеликоптер „Апачи“ од почетокот на конфликтот со Иран и се случува во период на повторно зголемени тензии во регионот, откако Иран и Израел разменија директни удари по прекинот на огнот.
Во истото интервју, Трамп потврди дека размислува за пошироки воени дејствија против Иран, откако мировните разговори не донеле резултати.
„Можам да продолжам. Имаа можност да потпишат договор и да преживеат“, изјави американскиот претседател, додавајќи дека е блиску до одлука за евентуални напади врз ирански електрани и мостови.
Тој повторно го обвини иранското раководство дека намерно ги одолговлекувало мировните преговори.
„Техеран ги влечеше САД за нос. За време на разговорите беше постигнат многу мал напредок“, порача Трамп.
