Трамп откри зошто се шминка: „Не сакам да изгледам како да сум мртов“

Американскиот претседател Доналд Трамп откри дека користи шминка и дека самиот ја нанесува, без помош од професионални шминкери. За својата навика зборуваше за време на политички собир во сојузната држава Џорџија, каде што го критикуваше демократскиот сенатор Џон Ософ.

Трамп тврдеше дека Ософ троши многу пари за шминкање, а потоа објасни зошто и самиот користи козметички производи, особено поради честите појавувања пред камерите.

— реклама —

„Ософ потрошил повеќе пари за шминка, а јас, инаку, користам многу малку и самиот се шминкам“, изјави Трамп пред присутните, притоа покажувајќи со рацете како ја нанесува шминката на лицето.

— реклама —

„Затоа што, ако не ставиш барем малку, изгледаш како да си мртов, а јас не го сакам тоа“, додаде американскиот претседател.

Тој тврдеше и дека неговиот политички противник има професионални шминкери кои постојано го придружуваат, но за тоа не понуди докази.

— реклама —

Препознатливиот тен на Трамп со години привлекува внимание во медиумите и на социјалните мрежи. Уште за време на неговиот прв претседателски мандат се шпекулираше како го постигнува карактеристичниот портокалест изглед на лицето.

Списанието „Венити фер“ претходно објави дека Трамп наводно сам нанесува проѕирна пудра пред телевизиските настапи. Медиумите пишуваа и дека посветувал внимание на осветлувањето во Белата куќа за да избегне на телевизија да изгледа премногу портокалово.

Во последните месеци, фотографиите на кои се забележуваат траги од козметички производи на неговото лице и рацете повторно ја ставија неговата рутина во центарот на вниманието.