Американскиот претседател Доналд Трамп не ја исклучи можноста за копнена воена операција во конфликтот со Иран, но порача дека не сака такво сценарио и дека постојат „други луѓе“ кои би можеле да ја извршат наместо американските сили.
Во интервју за „Фокс њуз“, Трамп на прашањето дали е можна копнена војна со Иран одговори: „Не сакам да го направам тоа. Понекогаш е потребна копнена операција, но имаме други луѓе кои ќе го одработат тоа за нас“, без да прецизира на кого мисли.
Воените аналитичари оценуваат дека евентуална копнена операција би можела да биде насочена кон стратешки цели, како што се островот Харг – главниот терминал за извоз на иранска нафта, или јужниот брег на Иран покрај Персискиот Залив.
Според анализите, секое искрцување на иранскиот брег би било исклучително сложена и ризична операција. Експертите предупредуваат дека современите беспилотни летала, минираните пристапи, артилеријата и противбродските системи значително ја зголемуваат предноста на бранителите во ваков тип операции.
И покрај тоа, американската војска веќе има значително присуство во регионот. Според Пентагон, во областа е распоредена 11. експедициска единица на маринците со повеќе од 2.000 војници, сместени на амфибиската борбена група околу бродот „УСС Боксер“. Во состојба на висока готовност е и 82. воздушнодесантна дивизија, која може да биде распоредена во рок од неколку часа за извршување специјални операции или заземање клучни објекти.
