Администрацијата на американскиот претседател Доналд Трамп повторно ја активира специјализираната телефонска линија за кризни интервенции наменета за ЛГБТК младите, но организацијата која одигра клучна улога во нејзиното создавање би можела да остане надвор од процесот.
Непрофитната организација „Тревор проект“, која важи за водечка американска организација за превенција од самоубиства кај ЛГБТК младите, можеби нема да може повторно да ги обезбедува услугите што помогна да се развијат за линијата 988, која претставува национален број за итни случаи поврзани со менталното здравје.
Минатата година администрацијата на Трамп ја укина опцијата „притисни 3“, наменета за ЛГБТК младите, со образложение дека недостигаат финансиски средства. Сега, по одлука на Конгресот за издвојување 33 милиони долари за интервенции насочени кон оваа група, администрацијата работи на повторно активирање на услугата до крајот на годината.
Сепак, „Тревор проект“, организација која е специјализирана токму за оваа област, би можела да остане без можност да аплицира за обезбедување на услугите.
Овој развој на настаните предизвика загриженост кај експертите, особено поради фактот што ЛГБТК младите имаат значително повисока стапка на обиди за самоубиство во споредба со општата популација.
Главната медицинска советничка на Американската фондација за превенција од самоубиства, д-р Кристин Ју Мутиер, оцени дека би било „бесмислено“ на „Тревор проект“ да му се ускрати можноста да помогне, нарекувајќи ја организацијата „долгогодишен, квалитетен и доверлив ресурс“ за ЛГБТК заедницата.
Демократската сенаторка од Висконсин, Тами Болдвин, која беше меѓу најгласните поддржувачи на обновувањето на услугата, го повика Трамп да ја врати без непотребни ограничувања и со најквалификуваните и најискусните лица кои ќе одговараат на повиците и пораките на младите.
Додека услугата беше активна, корисниците можеа со притискање на бројот 3, испраќање порака со зборот „PRIDE“ или преку интернет-разговор да стапат во контакт со советници специјално обучени за работа со ЛГБТК млади. За време на нејзиното функционирање биле регистрирани околу 1,6 милиони контакти, а „Тревор проект“ обработил приближно половина од нив.
Во меѓувреме, организацијата „Вајбрант Емоушнал Хелт“, која управува со линијата 988, објави повик за пријавување за управување со обновената услуга. Но, апликациите се ограничени само на кризни центри кои во моментов се активни членови на мрежата 988, а „Тревор проект“ не е меѓу нив, токму поради укинувањето на услугата за која беше специјализиран.
Извршниот директор на „Тревор проект“, Џејмс Блек, предупреди дека ваквиот пристап може да доведе до намалување на клиничките стандарди и изрази стравување дека новата верзија на услугата би можела целосно да ги исклучи трансродовите и небинарните млади лица.
