Трамп повторно му се закани на Иран: „Во одреден момент ќе мора да зададеме силен удар“

Американскиот претседател Доналд Трамп повторно упати воени закани кон Иран, најавувајќи дека САД можеби ќе мора да извршат силен напад, и покрај дипломатските напори за спречување нова ескалација на конфликтот.

— реклама —

Говорејќи пред свои поддржувачи во сојузната држава Ајова, Трамп изјави дека засега се воздржува од воена акција бидејќи сака да избегне човечки жртви.

„Единствената причина поради која сè уште не сум се пресметал со Иран е тоа што сакам да бидам внимателен. Сакам да се обидам да спасам животи, ако тоа е можно. Но, во одреден момент ќе мора да им зададеме силен удар“, рече Трамп.

— реклама —

Тој претходно им изјавил на новинарите дека САД имаат уште една или две цели во Иран што планираат да ги нападнат. Меѓу нив ја споменал и планината Пикекс во покраината Исфахан, за која постојат сомневања дека крие подземен нуклеарен објект.

— реклама —

Новите закани доаѓаат во време на преговори чија цел е да се спречат нови американски и израелски напади врз Иран. Конфликтот започнал на 28 февруари.

Според извештаите на американските медиуми, Трамп во саботата разговарал со израелскиот премиер Бенјамин Нетанјаху за преговорите со Техеран и можноста за продолжување на воените операции.

— реклама —

Нетанјаху наводно се залагал за напад веднаш по изборите за американскиот Конгрес, закажани за 3 ноември. Трамп, од друга страна, бил повеќе наклонет да ѝ даде дополнително време на дипломатијата.