Американскиот претседател Доналд Трамп најави привремено суспендирање на царините за увоз на говедско месо, во обид да ги намали цените за американските потрошувачи.
„Сакаме да ги намалиме цените на говедското затоа што тоа го сакаат луѓето. Тоа го сакаат гласачите“, изјави Трамп во петокот.
Според најавата објавена на неговата социјална мрежа Truth Social, царините за увоз на 300.000 тони говедско месо, наменето за продажба главно како мелено месо, ќе бидат суспендирани во следните 90 дена.
Трамп тврди дека увезеното месо ќе се продава по цена за околу 25 отсто пониска од актуелните пазарни цени.
Засега не прецизирал од кои земји ќе се увезува говедското месо.
Одлуката предизвика силни реакции кај американските сточари, кои предупредуваат дека евтиниот увоз може дополнително да го ослабне домашното производство.
„Ова е ладен туш за зголемувањето на американскиот сточен фонд“, изјави Колин Вудал, прв човек на националното здружение на одгледувачи на говеда.
Тој ја обвини администрацијата дека ја жртвува долгорочната стабилност на секторот за краткорочен политички ефект.
Критики стигнаа и од редовите на Републиканската партија.
Сенаторката од Небраска, Деб Фишер, изјави дека е „исклучително разочарана“ од одлуката на Белата куќа.
„Преплавувањето на пазарот со странско говедско ќе им наштети на нашите одгледувачи и ќе го ослаби долгорочното решение – зголемување на американскиот сточен фонд за да се задоволи побарувачката“, рече таа.
Цените на говедското месо во САД растат уште од пандемијата, а во последните 12 месеци, според наведениот извор, се зголемиле за дополнителни 10 отсто.
Растот се поврзува со намалената понуда, повисоките трошоци за производство и последиците од сушите во главните сточарски региони.
САД се меѓу најголемите потрошувачи на говедско месо во светот, со нешто повеќе од 23 килограми по жител во 2025 година, според податоците на ОЕЦД.
Одлуката на Трамп доаѓа во момент кога трошоците за живот се една од клучните грижи на американските граѓани пред парламентарните избори во ноември.
Потегот воедно покажува и судир меѓу неговата протекционистичка политика и притисокот да се намалат цените на храната, иако во кампањата постојано ветуваше дека предност ќе има домашното производство.
