Трамп призна дека поддршката за Израел и војната придонеле за изборниот пораз на републиканците

Американскиот претседател Доналд Трамп смета дека незадоволството на американската јавност од Израел, заедно со противењето на војната со Иран и растот на цените на горивата, придонело за поразот на републиканците на изборите за Конгресот во САД.

Во интервју за емисијата „60 минути“ на телевизијата Си-Би-Ес, Трамп изјави дека резултатот би бил поинаков доколку и неговото име било на гласачкото ливче, но призна дека дел од гласачите не ја поддржуваат американската политика кон Израел.

— реклама —

„Не им се допадна војната, не им се допадна ниту тоа што пораснаа цените на бензинот. А постои и големо, неверојатно незадоволство од Израел“, рече Трамп.

Тој оцени дека поддршката за Израел станала политички товар за дел од републиканските кандидати, иако двете големи американски партии традиционално ја поддржувале оваа земја. Меѓу критичарите на израелската политика е и новоизбраниот демократски сенатор од Мичиген, Абдул ел Саид, а потпретседателот Џеј Ди Венс навести дека републиканците можеби ќе треба да ја преиспитаат досегашната безусловна поддршка за Израел.

— реклама —

Трамп се согласил дека војната со Иран влијаела врз изборниот резултат, но нагласил дека не жали за одлуката за нејзино започнување. Според него, спречувањето на Иран да дојде до нуклеарно оружје е поважно од краткорочните политички последици.

— реклама —

Американскиот претседател најави и дека земјите што добивале американска заштита, меѓу кои и Израел, ќе мора да учествуваат во покривањето на трошоците за војната. Тој изјави дека без американската поддршка Израел не би можел да опстане.

Во меѓувреме, израелскиот новинар Амир Тибон предупреди дека новиот американски Конгрес би можел да ја блокира продажбата на оружје за Израел доколку владата на Бенјамин Нетанјаху не преземе чекори за подобрување на односите со Вашингтон.

— реклама —

Трамп претходно најави дека САД ќе ја укинат годишната помош од четири милијарди долари за Израел. Неколку дена подоцна, Нетанјаху изјави дека досегашната помош во иднина ќе се претвори во „партнерство“, без да открие дали претходно разговарал за тоа со американскиот претседател.

Израелскиот претседател Исак Херцог, во меѓувреме, му довери на политичкиот ривал на Нетанјаху, Гади Ајзенкот, задача да формира нова влада. Тој порача дека Израел се соочува со сериозни предизвици, меѓу кои и иранските закани, како и потребата од дипломатски план за периодот по војната.