Трамп разгледува нови напади врз Иран, адмиралот Купер му презентирал воени опции

Американскиот претседател Доналд Трамп разгледува можност за продолжување на големите воени операции против Иран, а во Белата куќа веќе биле презентирани неколку воени сценарија за можни нови напади. Според „Волстрит журнал“, адмиралот Бред Купер, командант на американските сили на Блискиот Исток, во четвртокот се сретнал со Трамп за да го информира за расположливите воени опции.

Според американскиот портал „Аксиос“, Трамп лично побарал процена за ефикасноста на поморската блокада на Иран. Разговорите ги опфатиле и обезбедувањето непречен премин на танкерите со нафта низ Ормускиот Теснец, како и економскиот притисок врз Техеран.

— реклама —

На состанокот присуствувале и министерот за одбрана Пит Хегсет, министерот за финансии Скот Бесент, потпретседателот Џеј Ди Венс и други високи претставници на американската администрација. Белата куќа и Централната команда на американските сили одбиле да го коментираат состанокот.

Вашингтон, според информациите, истовремено работи на две можности – постигнување договор со Иран и подготовка за продолжување на воените операции по изборите за Конгресот на 3 ноември. Засега Трамп нема донесено конечна одлука за нови напади, ниту е утврден датум за нивно започнување.

— реклама —

Во меѓувреме, регионални посредници предводени од Катар се обидуваат да спречат нова ескалација. Според „Аксиос“, катарските посредници неодамна му доставиле писмо од потпретседателот Венс на иранскиот претставник Мохсен Резаи, со предлог за обновување на преговорите, кои би ја опфатиле и иранската нуклеарна програма.

— реклама —

Трамп и Венс разговарале и за можноста за испраќање хуманитарна помош во Иран, вклучително храна и лекови, како гест што би можел да придонесе за отворање простор за дипломатски напредок.

Позитивни сигнали за можен договор доаѓаат и од американскиот амбасадор во Турција, Том Барак. Тој за Си-Ен-Ен изјави дека САД и Иран се многу блиску до договор за намалување на тензиите, но појасни дека не очекува веднаш да биде постигнато сеопфатно решение, туку привремен договор.

Од друга страна, Иран бара конкретни отстапки од Вашингтон пред продолжувањето на разговорите за нуклеарната програма. Меѓу условите се укинување на американската поморска блокада, ослободување на замрзнатиот ирански имот и повторно овозможување извоз на иранска нафта.

САД, пак, инсистираат нуклеарната програма на Иран да биде дел од преговорите. Додека дипломатските напори продолжуваат, американската администрација ги разгледува и воените можности, а останува неизвесно дали ќе биде постигнат договор пред изборите на 3 ноември.