Американскиот претседател Доналд Трамп повторно отвори тема за преименување на географска знаменитост, овојпат предлагајќи езерото Онтарио да го добие името „Езеро Америка“, во време на ново заострување на трговските односи меѓу САД и Канада.
Трамп на својата платформа „Truth Social“ напиша дека САД сериозно размислуваат за промена на името, образложувајќи ја идејата со тоа што, како што наведе, Вашингтон повеќе не очекува да „работи со Онтарио“.
Идејата потсетува на неговата минатогодишна одлука, со која преку извршна наредба, Мексиканскиот Залив беше преименуван во „Американски Залив“.
Предлогот доаѓа во период на сериозно влошување на односите меѓу Вашингтон и Отава. По неуспешните преговори, администрацијата на Трамп воведе царини од 50 отсто за канадска стока во вредност од околу 20 милијарди долари, а Канада најави сопствени мерки како одговор.
Тензиите особено се чувствуваат во автомобилската индустрија, производството на челик и алуминиум, како и во енергетиката и земјоделството. Трамп, воедно, се закани со дополнителни царини од 50 отсто за канадските автомобили и автомобилски делови.
Канадскиот премиер Марк Карни го обвини Вашингтон дека со трговските барања се обидува да ги потчини канадските интереси, оценувајќи дека политиката на САД може сериозно да ги погоди големите индустрии во земјата.
Иако САД и Канада имаат едни од најтесно поврзаните трговски односи во светот, особено преку автомобилската индустрија, енергетиката, земјоделството и производството, продолжувањето на трговскиот спор би можело да предизвика сериозни последици за компаниите и работниците од двете страни на границата.
Во меѓувреме, канадската влада подготвува мерки за поддршка на работниците погодени од царините, додека Карни најави дека Отава може да се откаже од целосно симетрични контрамерки и, наместо тоа, да се насочи кон потаргетирани мерки за заштита на канадските компании и работници.
