Трамп се закани дека ќе ги смета за „непријатели“ сите што ќе го користат терминот вештачка интелигенција наместо суперинтелигенција

Американскиот претседател Доналд Трамп ја засилува кампањата за промена на називот на вештачката интелигенција, барајќи наместо досегашниот термин да се користи „суперинтелигенција“. Тој порача дека Белата куќа ќе ги смета за „непријатели“ оние што нема да го прифатат новото име, објави „Политико“.

„Белата куќа го смета за непријател секој што го употребува терминот „вештачка интелигенција“, наместо новиот, попрецизен и широко прифатен термин „суперинтелигенција“!“, напиша Трамп на својата платформа „Трут соушл“.

— реклама —

Промената е дел од настојувањата на американскиот претседател технологијата да ја претстави во попозитивно светло. Нејзиниот брз развој, сепак, предизвикува загриженост кај законодавците и експертите, кои предупредуваат дека не се воспоставени доволно заштитни механизми за справување со безбедносните ризици. Загриженоста дополнително се зголеми по случаи во различни делови од светот во кои неконтролирани агенти пристапувале до владини интернет-страници.

— реклама —

Трамп главно ги отфрла повиците за ограничување на развојот на технологијата. На средбите со раководителите на технолошките компании во Белата куќа ја претставува вештачката интелигенција како корисна за светот и неопходна за економскиот раст и националната безбедност.

Во согласност со новата политика, Белата куќа ја измени и својата интернет-страница посветена на технологијата, заменувајќи ги споменувањата на „АИ“ со „СИ“, кратенка од „суперинтелигенција“. Сепак, интернет-адресата ai.gov останува непроменета. Од почетната страница е отстранет и описот на „Акцискиот план за вештачка интелигенција“, кој е заменет со упатување кон извршната наредба на Трамп за преименување на технологијата.

— реклама —

Промената ја најави и Илон Маск. Технолошкиот магнат во неделата објави на платформата „Икс“ дека неговата компанија за вештачка интелигенција ќе го смени името од „СпејсИксАИ“ во „СпејсИксСИ“.

Трамп вчера им ги врачи Националните медали за наука на Маск и на извршниот директор на „Нвидија“, Џенсен Хуанг. Ова е највисокото признание на американската влада за достигнувања во науката и инженерството.

Обидите за промена на називите не се новост за Трамп. За време на неговото претседателствување, администрацијата се залагаше Мексиканскиот Залив да се преименува во Американски Залив, а езерото Онтарио во Американско Езеро. Белата куќа се обиде и да му го ограничи пристапот на новинарскиот сервис „Асошиејтед прес“ до одредени простории, откако агенцијата одби да го прифати називот за Мексиканскиот Залив што го претпочита претседателот.