Големите шумски пожари што летово ја зафатија Канада и испратија густ чад над делови од САД предизвикаа остра размена на ставови меѓу американскиот претседател Доналд Трамп и научната заедница.
Трамп ја обвини Канада за лошо управување со шумите и најави дека ќе воведе мерки поради чадот што се прошири во американските сојузни држави. Тој оцени дека, доколку шумите биле подобро управувани, немало да има толку големи пожари.
Сепак, научниците сметаат дека главната причина е климатската криза. Според студија на меѓународната група World Weather Attribution, климатските промени значително ја зголемиле веројатноста за екстремни временски услови што поттикнуваат шумски пожари.
Истражувачите наведуваат дека условите што довеле до пожарите во Онтарио денес се јавуваат многу почесто отколку пред индустрискиот период, кога глобалната температура била за околу 1,4 степени Целзиусови пониска.
Климатологот Ендру Вивер оцени дека Трамп го обвинува чадот, но ја игнорира историската улога на САД како еден од најголемите емитери на стакленички гасови. Неговата колешка Фридерике Ото порача дека намалувањето на употребата на фосилни горива е клучно за спречување на вакви катастрофи.
Експертите дополнително посочуваат дека голем дел од канадските шуми се наоѓаат во оддалечени подрачја, каде што пожарите многу брзо се шират, што значително го отежнува нивното навремено гаснење.
