Американскиот претседател Доналд Трамп изјави дека разговорите меѓу Вашингтон и Техеран се одвиваат во позитивна насока и дека постојат реални шанси за напредок, но предупреди дека САД ќе продолжат со воени активности доколку преговорите пропаднат.
„Водиме добри разговори и ќе видиме што ќе се случи. Мислам дека постојат добри шанси да се постигне нешто. Ако успееме, тоа ќе биде одлично. Ако не, ќе се вратиме на она што го правевме пред два дена“, изјави Трамп пред новинарите во претседателскиот авион „Ер Форс Уан“ на пат кон сојузната држава Мичиген.
Тој тврди дека иницијативата за обновување на контактите дошла од иранска страна.
„Тие директно ни се обратија затоа што ги погодивме многу силно. Да немаше американски воени операции, Иран воопшто немаше да разговара“, рече Трамп.
На прашањето дали го губи трпението со преговорите, американскиот претседател одговори дека нема причина за тоа и додаде дека САД и Израел имаат целосно усогласен пристап кон Иран.
Во меѓувреме, агенцијата АП, повикувајќи се на регионални претставници, објави дека посредниците предводени од Катар и Пакистан постигнале значителен напредок во напорите повторно да ги вратат САД и Иран на преговарачка маса.
Според истите извори, посредниците се обидуваат да ги надминат разликите меѓу двете земји и да овозможат обновување на привремениот договор за прекин на огнот, кој пропадна по двонеделната ескалација на меѓусебните напади.
