Американскиот претседател Доналд Трамп упати остро предупредување до продавачите на гориво, барајќи веднаш да ги намалат цените. Во спротивно, како што порача, ќе се соочат со сериозни последици.
„Продавачите на гориво мора да ги намалат своите цени веднаш“, напиша Трамп на својата социјална мрежа.
Тој оцени дека нема оправдување за зголемување на цените и ги обвини компаниите за, како што наведе, незаконско покачување.
„Нема да има инфлација на цените, што е целосно нелегално. Ако продавачите не го сторат тоа, тие се во голема неволја. Започнете да се стремите кон цена од околу 2,50 долари за галон“, порача Трамп.
Минатата недела американскиот претседател соопшти дека му наложил на Министерството за правда да спроведе истрага за нафтените компании поради сомневања дека не ги намалуваат малопродажните цени на горивото и покрај падот на цената на суровата нафта на светските пазари.
Трамп ги обвини компаниите дека „претеруваат“ и дека неоправдано им наплаќаат високи цени на потрошувачите.
Во меѓувреме, цените на нафтата годинава бележат значителни осцилации поради ескалацијата на тензиите на Блискиот Исток, откако САД и Израел извршија напади врз Иран, а Техеран возврати со напади врз Израел и земји од Персискиот Залив каде што се наоѓаат американски воени бази.
Прашањето за високите цени на горивата останува чувствителна тема во САД, особено во пресрет на среднорочните избори во ноември, кога Републиканската партија ќе се обиде да го задржи тесното мнозинство во Конгресот.
