Американскиот претседател Доналд Трамп првпат се огласи по ноќешните американски воени напади врз Иран, оценувајќи дека примирјето меѓу двете земји повеќе не постои и дека САД одговориле со силна воена акција.
За време на средбата со генералниот секретар на НАТО, Марк Руте, во Анкара, Трамп го обвини иранското раководство дека продолжило со нападите и покрај претходните договори.
„Им рековме да ги извршат своите погребни церемонии, но наместо тоа вчера повторно почнаа да лансираат ракети и да напаѓаат бродови. Затоа синоќа многу силно ги погодивме“, изјави Трамп.
Тој додаде дека американските напади биле „20 пати посилни“ од иранските одмазднички акции.
„Им кажав дека на секој нивен напад ќе возвратиме со наш напад. Но тие играат валкано и напаѓаат сè што ќе стигнат. Не ми се допаѓаат. Не ги сакам. Тоа се злобни луѓе“, рече американскиот претседател.
Трамп оцени дека САД изгубиле премногу време во обидите да постигнат договор со Техеран.
„Тоа се злобни и болни луѓе. Тие се како рак. А знаете што се прави со ракот? Треба да се отстрани што е можно порано“, изјави тој.
Одговарајќи на новинарско прашање дали смета дека американско-иранското примирје е завршено, Трамп рече дека според него тоа повеќе не постои.
„Според мене, примирјето е завршено. Повеќе не сакам да имам работа со нив. Ќе разговарам со нашите преговарачи. Тие сакаат преговори, но според мене, разговорите со нив се само губење време“, истакна Трамп.
САД и Иран на 17 јуни потпишаа меморандум за разбирање со кој беше прекинат воениот судир и беше договорен 60-дневен период за преговори со цел постигнување траен мировен договор. Сепак, американската војска во текот на ноќта изврши серија напади врз цели во Иран, наведувајќи дека станува збор за одговор на нападите врз трговски бродови во Ормускиот теснец.
