Американскиот претседател Доналд Трамп објави доверливи разузнавачки документи за кои тврди дека покажуваат кинеско мешање во американските избори, иако претходните процени на американската разузнавачка заедница не утврдија докази дека Пекинг влијаел врз исходот на претседателските избори во 2020 година.
Во обраќање кое траеше околу 25 минути, Трамп изјави дека Кина незаконски дошла до податоци за околу 220 милиони американски гласачи, вклучувајќи имиња, адреси и информации што се користат при регистрацијата за гласање. Тој исто така обвини дел од американските разузнавачки служби дека намерно ги прикривале информациите за, како што рече, обемот на кинеските активности.
Сепак, проценка на американската разузнавачка заедница од 2021 година заклучи дека нема докази оти странски актери се обиделе или успеале да променат кој било технички аспект на изборите во 2020 година, вклучително и регистрацијата на гласачите, гласачките ливчиња, пребројувањето или конечните резултати. Таа проценка беше изготвена за време на првиот мандат на Трамп, кога директор на Националното разузнавање беше Џон Ретклиф, кој денес е директор на ЦИА.
Пред обраќањето, дел од претставниците на Белата куќа изразиле загриженост дека објавувањето на доверливите материјали би можело да создаде погрешен впечаток за нивната содржина. Во меѓувреме, кинеската амбасада во Вашингтон ги отфрли обвинувањата, истакнувајќи дека Кина никогаш не се мешала и нема да се меша во претседателските избори во САД.
Трамп повторно повика Конгресот да усвои построги правила за идентификација на гласачите и докажување американско државјанство при регистрацијата за гласање, тврдејќи дека тоа е неопходно за заштита на изборниот процес. Од друга страна, демократите и повеќе експерти посочуваат дека изборните измами во САД се исклучително ретки и предупредуваат дека ваквите мерки би можеле да им го отежнат гласањето на дел од граѓаните.
Демократскиот сенатор Марк Ворнер ги отфрли тврдењата на Трамп, оценувајќи дека американските разузнавачки агенции едногласно утврдиле дека Кина не се обидела да промени ниту еден глас на изборите во 2020 година.
