Трамп тврди едно, Техеран друго: Неизвесна судбината на инспекциите во Иран

Директорот на Меѓународната агенција за атомска енергија (ИАЕА), Рафаел Маријано Гроси, изјави дека инспекторите на агенцијата во иднина ќе ги посетат иранските постројки за збогатување ураниум, и покрај спротивставените ставови меѓу Техеран и Вашингтон околу тоа прашање.

Гроси призна дека во моментов постојат различни толкувања во врска со евентуалните инспекции, оценувајќи дека станува збор за „војна на зборови“.

— реклама —

„Можам да ги разберам политичките изјави, тие се дел од реалноста, но постои меморандум за разбирање потпишан од двете страни, кој јасно предвидува дека сите нуклеарни активности ќе бидат предмет на целосен надзор од ИАЕА“, изјави Гроси на прес-конференција во нуклеарната централа Фукушима Даичи во Јапонија.

Тој нагласи дека инспекциите се неизбежни, иако засега не е познато кога точно ќе започнат.

„Дали тоа ќе биде за два дена, за една седмица или за десет дена не е суштинското прашање. Тоа ќе се случи“, порача Гроси.

— реклама —

Од друга страна, заменик-министерот за надворешни работи на Иран, Казем Гарибабади, ги отфрли ваквите тврдења, истакнувајќи дека Техеран не разговарал со Гроси за време на неговата посета на Швајцарија.

Според Гарибабади, евентуалните инспекции ќе можат да се разгледуваат исклучиво во рамки на конечен договор и само откако ќе бидат укинати санкциите и ќе бидат преземени конкретни чекори од другата страна.

— реклама —

Во меѓувреме, американскиот претседател Доналд Трамп изјави дека Иран се согласил на инспекции и дека американски инспектори ќе се приклучат на тимовите на ИАЕА при посетите на иранските нуклеарни објекти.

„Тие се согласија на тоа, се согласија со инспекторите“, изјави Трамп за „Фокс њуз“.

Неговите тврдења директно се косат со ставот на иранското Министерство за надворешни работи, од каде претходно соопштија дека во моментов нема закажани инспекции на нуклеарните постројки оштетени во американските и израелските напади.

ИАЕА нема пристап до иранските постројки за збогатување ураниум од почетокот на 12-дневниот конфликт меѓу Израел и Иран во 2025 година.

Иран тврди дека неговата нуклеарна програма има исклучиво мирољубив карактер, иако според проценките на ИАЕА, земјата располага со значителни количества високо збогатен ураниум.