Трамп: „Во рок од два до три дена би можеле да постигнеме договор со Иран“

Американскиот претседател Доналд Трамп изјави дека американската дипломатија ги вложува последните напори за постигнување договор со Иран, по новата ескалација на Блискиот Исток и размената на напади меѓу Израел и Иран.

Трамп оцени дека разговорите се во завршна фаза и изрази очекување дека договор би можел да биде постигнат во рок од два до три дена.

— реклама —

„Вложуваме завршни напори за она што ќе биде многу, многу добар договор“, изјави Трамп.

Неговата изјава доаѓа по новите напади што ги зголемија тензиите меѓу Израел и Иран, иако примирјето договорено пред два месеци сè уште формално е во сила. Во текот на викендот и почетокот на неделата повторно се слушнаа сирени за воздушна опасност во Тел Авив и експлозии во Техеран.

— реклама —

Според иранските власти, во последните напади биле повредени најмалку 15 лица. Во меѓувреме, Трамп јавно ги повика двете страни веднаш да ги прекинат непријателствата.

— реклама —

Техеран соопшти дека ја прекинува воената операција против Израел, додека израелскиот премиер Бенјамин Нетанјаху изјави дека борбените дејства на тој фронт се запрени. Сепак, и двете страни предупредија дека ќе одговорат силно на секој нов напад.

Дополнителна точка на спор останува Либан, каде што продолжуваат судирите меѓу Израел и Хезболах. Иран бара ова прашање да биде дел од поширок мировен договор, додека Вашингтон се залага конфликтот во Либан да се решава во подоцнежна фаза.

— реклама —

Во меѓувреме, се појави и нов безбедносен предизвик во Црвеното Море. Израелската армија соопшти дека пресретнала сомнителна воздушна цел од правец на Јемен, откако јеменските Хути презедоа одговорност за нов напад и најавија забрана за израелска пловидба во регионот.

И покрај најавите за напредок во преговорите, состојбата на Блискиот Исток останува исклучително нестабилна, а дипломатските напори продолжуваат во обид да се спречи поширок регионален конфликт.