Американскиот претседател Доналд Трамп остро ги нападна повиците за забавување и построго регулирање на развојот на вештачката интелигенција, оценувајќи дека во тек е „болен заговор“ против ВИ и дата-центрите од кој, според него, најголема корист би имала Кина.
Трамп реагираше откако повторно се засили дебатата за потенцијалните ризици од најнапредните системи за вештачка интелигенција. Повод беше и есејот на извршниот директор на Anthropic, Дарио Амодеи, кој побара развојот на најмоќните модели да се забави и да се воведе построг надзор.
„Единствената контрола или ограничувања што ѝ се потребни на вештачката интелигенција е силен и паметен претседател, а САД го имаат, и тоа во изобилство“, напиша Трамп на својата социјална мрежа Truth Social.
Тој директно го нападна и Амодеи, тврдејќи дека неговата администрација веќе располага со доволно механизми за интервенција доколку компаниите што развиваат вештачка интелигенција постапуваат неодговорно.
„Веќе имаме огромни казнени и регулаторни овластувања над овие компании. Во тек е болен заговор против вештачката интелигенција и дата-центрите, а единствениот што е среќен поради тоа е Кина“, напиша Трамп.
Американскиот претседател смета дека лидерството во развојот на ВИ е директно поврзано со глобалната технолошка и економска надмоќ.
„Кој и да победи во вештачката интелигенција – победува! Пред Кина и сите останати сме и така ќе продолжиме“, порача Трамп.
Неговите пораки доаѓаат во момент кога дел од водечките луѓе во индустријата предупредуваат дека брзината со која се развиваат најнапредните модели носи сериозни ризици.
Амодеи во есејот „We Must Pace the Frontier“ предложи независно следење и тестирање на моделите во текот на нивниот развој, регулатива што би важела за целата индустрија и воспоставување глобални правила.
Поддршка за дел од неговите предлози, според објавените изјави, дадоа и извршниот директор на OpenAI, Сем Алтман, како и основачот на xAI, Илон Маск. Алтман ја поддржа идејата за независни надзорни механизми за процена на безбедноста на моделите, додека Маск оцени дека Амодеи е во право.
Дебатата дополнително се засилува поради сè поголемите способности на новите модели, особено во областа на кибербезбедноста. Компаниите што ги развиваат најнапредните системи во повеќе наврати пријавуваа загрижувачко однесување во контролирани тестови, поради што дел од моделите и функциите биле ограничувани или дополнително тестирани пред поширока употреба.
Амодеи повикува развојот на технологијата да продолжи, но со темпо што ќе овозможи истовремено да се искористат придобивките од вештачката интелигенција и да се контролираат потенцијалните ризици.
Трамп, од друга страна, јасно ја поставува темата во контекст на технолошката трка со Кина и се спротивставува на мерки што, според него, би можеле да ја забават американската индустрија.
