Трет пораз по ред за Македонија, седум натпревари без гол: Седлоски призна – Шкотска беше побрза, подобра и посилна

Македонската фудбалска репрезентација го претрпе и третиот пораз во групата Б1 од Лигата на нации, откако вечерва на Националната арена „Тодор Проески“ во Скопје загуби од Шкотска со 0:2. За гостите ова беше прва победа во групата, додека Македонија и по третото коло останува без освоен бод.

Резултатската криза на националниот тим продолжува – Македонија седми натпревар по ред не успева да постигне гол, а серијата без победа сега изнесува 11 натпревари.

Шкотска уште од почетокот на натпреварот ја презеде иницијативата, а до водство стигна во седмата минута. Керон Боуви ја погоди мрежата на Столе Димитриевски за 0:1, постигнувајќи го својот дебитантски гол во дресот на шкотската репрезентација.

Македонија имаше проблеми во играта уште во првиот половина час, по што селекторот Гоце Седлоски реагираше со две рани замени. Во 31. минута Ѓорѓе Џеков и Јани Атанасов влегоа на местата на Себастијан Херера и Лука Станковски.

— реклама —

Ниту промените не донесоа посериозен пресврт во играта, а Шкотска продолжи да создава шанси пред македонскиот гол.

Во второто полувреме судијата Франсоа Летексие најпрво досуди пенал за Шкотска, но по прегледувањето на ВАР-снимката ја поништи одлуката бидејќи претходно Матеј Гаштаров беше фаулиран.

Во 62. минута Седлоски направи уште две промени. Капитенот Енис Барди и Бојан Илиевски го напуштија теренот, а на нивно место влегоа Агон Елези и Љупче Дориев.

— реклама —

Неколку минути подоцна следуваше нова спорна ситуација во македонскиот шеснаесетник. Бојан Миовски играше со рака, а иако во акцијата имаше контакт над Висар Муслиу, Летексие по ВАР-проверката покажа на белата точка.

Џон Мекгин беше сигурен реализатор на пеналот и го зголеми водството на Шкотска на 0:2.

Последната промена во македонскиот состав следуваше во 79. минута, кога Христијан Малески го замени Матеј Гаштаров.

Македонија доби повеќе простор во завршницата откако Скот Мекена беше исклучен, но ниту со играч повеќе не успеа да ја прекине серијата натпревари без постигнат гол.

— реклама —

Шкотска во текот на натпреварот упати повеќе од 20 удари кон македонскиот гол, а Столе Димитриевски со повеќе интервенции спречи поубедлив пораз.

По натпреварот селекторот Гоце Седлоски призна дека неговата репрезентација не изгледала добро, особено во првиот дел, и објасни зошто уште во 31. минута направил две замени.

„И самите видовте дека не одеше во првите половина час, затоа ги направив измените. Станковски кога влегуваше во изминатите мечеви даваше живост. Мислев дека може да одговори денеска. Истото важи за Херера. Честитки за Шкотска. Побрзи, подобри, посилни. Затоа играат таму каде што играат“, изјави Седлоски.

— реклама —

Селекторот порача дека нема намера да се повлече по третиот последователен пораз.

„Јас не застанувам овде. Не застанавме добро во првиот дел. Нè фати паника. Шкотска го искористи тоа. Во целост тежок пораз. Реално, кажавме и пред ова. Со Словенија единствено можеме да се носиме. Сè уште е топла главата, што се вели. Но, треба ли да се коментира за една Швајцарија? Премиерлигашки играчи. Наспроти тоа, тројца од македонскиот шампионат. Ќе се борам, ќе работам и понатаму“, рече Седлоски.

По три одиграни кола Македонија е последна во групата Б1 без освоен бод. Швајцарија вечерва ја совлада Словенија со 2:1 и е лидер со девет бодови, додека Шкотска и Словенија имаат по четири.

За Македонија следува нов тежок предизвик. На 6 октомври националниот тим гостува кај Швајцарија, против која ќе се обиде да ја прекине серијата од три порази, седум натпревари без постигнат гол и 11 натпревари без победа.