Со цел да се намали бројот на комарци и да се спречи нивното понатамошно размножување, вечерва во Драчево ќе се спроведе нова вонредна акција за дезинсекција.
Акцијата ја организира Центарот за јавно здравје во соработка со Општина Кисела Вода, а ќе го опфати подрачјето на населбата и селото Драчево. Прскањето ќе трае од 22:00 до 24:00 часот и ќе се врши со специјализирано возило, со третман насочен кон возрасните комарци.
Ова е трета вонредна интервенција во рамките на засилените мерки против комарците. Првата акција беше реализирана кон крајот на минатиот месец, додека пред два дена беше спроведен вториот третман, при кој биле уништувани ларви во каналите и влажните површини со соодветен ларвицид.
Од надлежните апелираат до пчеларите навреме да ги заштитат пчелните семејства поради вечерашното прскање.
Истовремено, граѓаните се повикуваат во периодот од 22:00 до 24:00 часот, доколку имаат можност, да ги држат затворени прозорците и вратите за време на третманот.
