Трето вонредно прскање против комарци во Гази Баба, опфатени повеќе населени места

Третото вонредно прскање против комарци на територијата на Општина Гази Баба заврши во 3 часот утрово, а во текот на ноќта екипите поминаа низ повеќе населени места и делови од општината.

Градоначалникот Бобан Стефковски информираше дека со акцијата биле опфатени Керамидница, Смилковци, Црешево, Стајковци, Сингелиќ, Ченто, Инџиково, Маџари, Триангла, Хиподром, Ергеле, Трубарево, Раштак, Булачани, Виниче, Брњарци, Гоце Делчев, Јурумлери, Идризово, Дрма, Колонија, Кирил Петрушевски, Автокоманда и Железара.

— реклама —

Прскањето било реализирано во координација меѓу Центарот за јавно здравје, Град Скопје и Општина Гази Баба, со цел навремено и ефикасно превентивно дејствување и заштита на здравјето на граѓаните.

— реклама —

„Институциите функционираат, институциите се координирани и институциите постапуваат“, порача Стефковски, изразувајќи благодарност до сите екипи што во текот на ноќта биле на терен.

Тој нагласи дека станува збор за континуирана активност, а не за еднократна акција. Засилените превентивни активности против комарци ќе продолжат и во следните денови, согласно состојбата на терен и препораките на надлежните институции.

— реклама —

Од Општина Гази Баба посочуваат дека ќе продолжи координацијата меѓу институциите, следењето на состојбата и преземањето на потребните мерки за заштита на здравјето и безбедноста на граѓаните.