Третпат го гонат поранешниот шеф на ФБИ: „Би било смешно да не беше толку ужасна злоупотреба“

Против поранешниот директор на американското Федерално истражно биро (ФБИ), Џејмс Коми, е покрената нова кривична постапка поради наводно откривање информации поврзани со националната одбрана на САД. Ова е третпат американското Министерство за правда да покрене постапка против Коми, кој со години е јавен критичар на претседателот Доналд Трамп, објави Би-би-си.

Според судскиот поднесок, новиот предмет содржи две точки, но документот од три страници открива малку детали за обвиненијата. Адвокатите на Коми во дополнителни поднесоци навеле дека случајот се однесува на наводно откривање доверливи информации на весникот „Њујорк тајмс“ во октомври 2016 година, кога тој бил директор на ФБИ.

Коми ги отфрли обвинувањата и во видеообраќање објавено во понеделникот на платформата „Сабстак“ го обвини Министерството за правда за злоупотреба на своите овластувања.

„Би било речиси смешно да не стануваше збор за толку ужасна злоупотреба на Министерството за правда, на која не смееме да станеме имуни“, изјави Коми.

— реклама —

Тој порача дека и понатаму се смета за невин, дека не се плаши од луѓето кои стојат зад постапките и дека сè уште верува во независноста на федералното судство.

Новата постапка е поведена во Вашингтон преку кривична пријава поднесена директно до судот, а не преку класичен обвинителен акт одобрен од голема порота. Во американскиот правосуден систем, големата порота одлучува дали постојат доволно докази за формално покренување обвинение.

Адвокатот на Коми, Патрик Фицџералд, изјави дека два различни обвинителски тима веќе го истражувале наводното откривање информации на „Њујорк тајмс“ и дека во двата случаи било одлучено да не се покренува обвинение.

„И двата пати владата заклучила дека против никого не треба да се поднесе обвинение“, изјави Фицџералд, оценувајќи дека новата постапка претставува обид неговиот клиент да биде гонет за дела што не ги сторил.

— реклама —

Одбраната веќе побарала отфрлање на обвиненијата.

Поранешниот федерален обвинител Глен Киршнер за Би-би-си изјави дека во случајот можно е да настапила десетгодишна застареност, поради што смета дека барањето за отфрлање има сериозни изгледи да биде прифатено.

Киршнер оцени дека новата постапка изгледа како обид за политичка одмазда од страна на Трамп, кој, според него, сака Министерството за правда да најде основ за кривично гонење на поранешниот директор на ФБИ.

Трамп го разреши Коми за време на својот прв претседателски мандат, откако ФБИ отвори истрага за наводното руско мешање во американските претседателски избори во 2016 година. Оттогаш, Трамп повеќепати јавно бараше кривично гонење на Коми.

— реклама —

Првата постапка против поранешниот директор на ФБИ беше покрената во септември 2025 година, кога беше обвинет дека го лажел Конгресот при сведочење и дека попречувал конгресна постапка. Коми се изјасни за невин, а предметот беше отфрлен во ноември истата година.

Во април 2026 година против него беше покрената и постапка поради објава на Инстаграм од 2025 година, на која школки на плажа биле наредени во форма на броевите „86 47“.

Обвинителството тврдеше дека комбинацијата претставува закана кон Трамп, бидејќи бројот 86 во американскиот жаргон може да означува отстранување некого, додека 47 се однесува на редниот број на Трамп како претседател на САД.

Коми негираше дека имал намера да упати закана и тврдеше дека не го знаел значењето на комбинацијата. Таа постапка сè уште е во тек.

Новите обвиненија беа објавени истиот ден кога федерален судија пресуди дека Министерството за правда незаконски ја отпуштило ќерката на Коми, Морин Коми, која работела како федерална обвинителка во Њујорк.

Таа останала без работа во јули 2025 година, по што ја тужела владата, тврдејќи дека била отпуштена поради нејзиниот татко и претпоставените политички ставови.

Според пресудата, администрацијата на Трамп мора да ја врати на работа и да ѝ ги исплати заостанатите плати.