Трговската размена меѓу Русија и земјите од Европската Унија продолжува да се намалува, достигнувајќи историски ниско ниво. Во првите шест месеци од годинава, вкупната размена изнесувала 26,9 милијарди евра, што е пад од 13 отсто во однос на истиот период лани и најниско ниво од почетокот на 1999 година.
Според податоците на Евростат што ги пренесува „Комерсант“, руските компании во периодот од јануари до јуни извезле стока во ЕУ во вредност од 12,2 милијарди евра, додека увозот од земјите на Унијата изнесувал 14,8 милијарди евра.
Со тоа, ЕУ остварила трговски суфицит со Русија од 2,6 милијарди евра, продолжувајќи го трендот започнат во втората половина од 2025 година. Пред воведувањето на сеопфатните трговски ограничувања, Унијата традиционално имаше дефицит во трговијата со Русија, кој во одредени години пред почетокот на војната во Украина достигнуваше десетици милијарди евра.
И покрај санкциите, гасот останува највредниот руски производ што го купуваат земјите од ЕУ. Увозот на руски гас во првото полугодие бил вреден 7,4 милијарди евра, што е намалување од три отсто на годишно ниво.
На второ место е руската нафта, чиј извоз кон ЕУ е повеќе од преполовен и изнесувал 1,3 милијарди евра. Увозот на црни метали паднал речиси за половина, на 715,4 милиони евра, додека увозот на никел изнесувал 426 милиони евра.
Европската Унија во истиот период од Русија увезла и риба во вредност од 352 милиони евра, осум отсто помалку од лани, додека увозот на руски ѓубрива речиси петкратно се намалил, на 298 милиони евра.
Одредени помали категории, сепак, бележат раст. Увозот на тутун и суровини за ароматизација и производство на тутунски производи се зголемил 13 пати, на пет милиони евра. Увозот на замрзнато бобичесто овошје речиси се удвоил, достигнувајќи 726.000 евра, додека увозот на книги и друга печатена продукција пораснал за повеќе од една четвртина, на 11 милиони евра.
Од друга страна, извозот од ЕУ кон Русија продолжува да опаѓа во речиси сите категории, под влијание на проширените ограничувања. Извозот на возила во првите шест месеци изнесувал само 81 милион евра, во споредба со две милијарди евра во истиот период во 2022 година.
Извозот на машини и електронска опрема паднал од 1,8 милијарди евра на 171 милион евра.
Најголема категорија производи што Русија ги увезува од ЕУ сега се фармацевтските производи. Нивниот увоз пораснал за 21 отсто, достигнувајќи 5,7 милијарди евра.
Русија од земјите на ЕУ увезува и козметика и производи за нега на кожа во вредност од 236 милиони евра, додека увозот на вино пораснал за два отсто, на 225 милиони евра.
Германија останува најголем трговски партнер на Русија меѓу земјите членки на ЕУ, со вкупна размена од 3,8 милијарди евра во првото полугодие. Следуваат Франција со 2,9 милијарди, Белгија со 2,8 милијарди, Холандија со 2,6 милијарди и Унгарија со 2,1 милијарда евра.
