Три дози од „ДеТеПер“ вакцината против голема кашлица беа доволни за децата денеска да почнат во градинка. Десетици кои минатата недела останаа дома, сега се назад во занималните, а ќе можат да останат само ако во наредните шест месеци примат и ревакцина. Ова се мерките на Комисијата за заразни болести, откако беше обзнането дека состојбата со големата кашлица е лоша, особено во Скопје каде 50 отсто од децата се невакцинирани.
Рестриктивните мерки на здравствените власти ги наполнија вакциналните пунктови. Интересот за вакцинирање и натаму е голем, но Скопје се уште брои деца кои што треба да ја комплетираат вакцинацијата против пертусис.
Вкупно во земјава се евидентирани 216 случаи на голема кашлица, а 88 проценти или 190 се во главниот град, каде е прогласена епидемија на голема кашлица на 8 февруари.
