Три лица и фирма во стечај пријавени за даночно затајување од над 23 милиони денари

Управата за финансиска полиција поднела кривична пријава против три физички лица и едно правно лице поради сомневање за даночно затајување, со кое, според истрагата, бил оштетен државниот буџет за 23.252.988 денари.

— реклама —

Пријавата е поднесена до Основното јавно обвинителство Скопје против ополномоштено лице, како и против сопственичката и управителката на правно лице кое сега е во стечај, и самиот правен субјект.

— реклама —

Според Финансиската полиција, пријавените во текот на 2022 и 2023 година преземале дејствија со кои избегнале пресметување, пријавување и плаќање на законските даночни обврски, со намера да стекнат противправна имотна корист.

Како што информираат од Управата, без соодветно покритие биле подигнати 8.912.345 денари од сметката на фирмата. Дополнително, не биле евидентирани позајмици кон физички лица во вредност од 21.742.806 денари како непризнаени расходи за даночни цели, ниту застарени обврски од 148.489.312 денари биле прикажани како приходи во даночниот биланс за 2023 година.

— реклама —

Финансиската полиција наведува и дека неосновано била присвоена трговска стока евидентирана на залиха, во вредност од 14.937.751 денар, без да бидат подмирени соодветните даночни обврски.

— реклама —

Со овие дејствија, според пријавата, биле избегнати плаќања на данок на личен доход, данок на добивка и данок на додадена вредност во вкупен износ од 23.252.988 денари.