Три тела пронајдени на стрелиште во Црна Гора

Тројца мажи се пронајдени мртви на стрелиште во близина на Даниловград, Црна Гора, по што е започната голема полициска акција и потрага по осомничен вооружен сторител.

Според црногорската полиција, околу 17 часот сопственикот на стрелиштето „Чешка збројевка“ го пријавил случајот во Одделението за безбедност во Даниловград, откако во објектот пронашол три безживотни машки тела.

— реклама —

Полицијата веднаш излегла на местото, а во тек се увид и истражни дејствија во координација со државен обвинител од Вишото државно обвинителство во Подгорица. Се утврдуваат околностите под кои било употребено огнено оружје и дошло до смртта на тројцата мажи.

— реклама —

Во меѓувреме, се спроведуваат засилени полициски контроли, а се проверуваат и возилата што се движат од Даниловград кон Подгорица. Полицијата ги повика граѓаните да останат во своите домови додека трае потрагата по осомничениот.

Според информации што ги пренесуваат регионалните медиуми, тројцата загинати наводно биле вработени како инструктори на стрелиштето. Неофицијално се наведуваат имињата Петар Глобаревиќ (24) од Подгорица, Момир Радоњиќ (67) од Даниловград и Немања Капор (20) од Подгорица.

— реклама —

Овие информации, како и околностите на настанот, сè уште не се официјално потврдени од црногорската полиција.

Од Управата на полицијата соопштија дека се врши и криминалистичка обработка на местото на настанот, како и утврдување на идентитетот на починатите.

Засега не е соопштено кој го употребил огненото оружје, ниту што точно се случувало на стрелиштето пред да биде пријавен случајот. Полицијата најави дополнителни информации по завршувањето на првичните истражни дејствија.