Тригодишно момче се здобило со тешки повреди откако било фрлено во живеалиште со крокодили во зоолошка градина во англиската област Кембриџшир. Детето досега поминало низ пет операции, а лекарите најавуваат дека го очекуваат уште најмалку две хируршки интервенции и долг период на рехабилитација.
Според полициската истрага, инцидентот се случил на 18 јуни во зоолошката градина „Johnsons of Old Hurst“, кога 30-годишен маж, кој не му бил познат на семејството, го фрлил детето во просторот каде што се наоѓале крокодилите.
Осомничениот бил уапсен за обид за убиство, но подоцна бил пуштен со кауција, откако било проценето дека не е способен да биде сослушан. Според британските медиуми, станува збор за лице со пречки во развојот.
Момчето веднаш било извлечено од живеалиштето од вработените во зоолошката градина, кои му дале прва помош до пристигнувањето на итната медицинска служба. Потоа било пренесено во болницата „Аденбрукс“ во Кембриџ, каде што и натаму се лекува.
Родителите изјавиле дека од денот на несреќата практично живеат во болницата и дека нивниот син досега бил подложен на пет операции.
„Патот до неговото закрепнување е неизвесен, но знаеме дека нема да биде краток“, порачаа тие.
Во меѓувреме е покрената и внатрешна истрага во болницата, откако било утврдено дека околу 40 членови на медицинскиот персонал пристапиле до медицинската документација на повреденото дете.
