Тројца скијачи загинаа денеска откако биле однесени од лавина во луксузното француско алпско скијачко одморалиште Val d'Isere, изјави пред новинарите Седрик Боневи, одговорен за безбедноста на патеките во местото.
Боневи соопшти дека една од жртвите е француски државјанин, додека другите двајца се странци, додавајќи дека во тек е истрага за несреќата.
Според медиумските извештаи, трагедијата се случила надвор од обележаните и уредени скијачки патеки. Се чини дека една од жртвите била зафатена од лавината високо на планинска падина, додека преостанатите две лица биле дел од група од петмина скијачи, меѓу кои и професионален водич, на пониска надморска височина, од каде што не можеле да ја забележат опасноста што се приближувала.
Засега не е познато што ја предизвикало лавината, изјави Боневи.
Француската национална метеоролошка служба Meteo France во четвртокот го стави регионот под црвено предупредување поради висок ризик од лавини.
