Тројца уапсени за смртоносните експлозии пред домовите на политичари во Солун

Грчката полиција утринава спроведе антитерористичка акција во Солун и на островот Крит, при што се уапсени три лица осомничени за поставување импровизирани експлозивни направи пред домови на членови на владејачката партија Нова демократија. Во нападите, што се случија на 1 јули, животот го загуби една жена, а четири лица беа повредени.

— реклама —

Од грчката полиција соопштија дека операцијата ја спроведува Секторот за борба против тероризмот и дека, покрај апсењата, се вршат претреси во повеќе објекти и возила.

— реклама —

„Досега се уапсени три лица, а претресите сè уште се во тек. Дополнителни информации ќе бидат соопштени во текот на денот“, наведуваат од полицијата.

Според грчките медиуми, станува збор за двајца мажи и една жена, кои и претходно ѝ биле познати на полицијата поради нивни анархистички активности.

— реклама —

Експлозиите се случија во раните утрински часови на 1 јули, кога во период од само 17 минути беа активирани три импровизирани експлозивни направи на различни локации во Солун. Цел на нападите беа домовите на претседателот на Управниот комитет на Нова демократија во Солун, Зисис Јоакимовиц, поранешниот пратеник Савас Анастасиадис и партиската кандидатка Афродити Нестора.

— реклама —

Најтешки последици имаше експлозијата пред домот на Нестора, каде што беа повредени пет лица, меѓу кои и кандидатката и нејзините родители. Нејзината 72-годишна мајка, Ваја Нестора, подоцна им подлегна на повредите.