Туфегџиќ: Уставниот суд создаде амбиент на вина за судија уште пред постапка

Адвокатот и поранешен судија Владимир Туфегџиќ остро реагираше на соопштението и образложението на Уставниот суд, оценувајќи дека со него се создава амбиент на вина и осуда за еден судија, што, според него, е спротивно на праксата на Европскиот суд за човекови права.

„Во правна држава судските одлуки мораат и треба да се спроведуваат и почитуваат. Тоа е основа на правната сигурност доколку законите и воспоставената судска пракса важат подеднакво за сите“, напиша Туфегџиќ.

— реклама —

Тој посочува дека не му е јасно што сакал да постигне Уставниот суд со ваквото соопштение, но смета дека пристапот е погрешен.

„Со образложението на ‘уставната’ одлука се прави токму она што е стриктно забрането согласно праксата на ЕСЧП – однапред се создава амбиент на вина и осуда на еден судија“, наведува Туфегџиќ.

— реклама —

Според него, наместо да се бара кривична одговорност, Уставниот суд требало да укаже на потребата од дополнителна едукација на судиите и Академијата за судии и јавни обвинители за правилна примена на неговите одлуки и воспоставување воедначена судска пракса.

„Наместо во институциите, дебатата се префрла како по обичај на ниво на Фејсбук-дискусија, што е подеднакво лошо како и содржината на соопштението и образложението на одлуката на Уставниот суд“, оценува тој.

— реклама —

Туфегџиќ смета дека проблемот со непочитувањето на судските одлуки не е нов и потсетува на случајот со обвиненијата на поранешното Специјално јавно обвинителство.

„Да не се заборави одлуката за подигнатите обвиненија на СЈО по истекот на рокот од 18 месеци. Никој не ја есапеше одлуката на Врховниот суд и никој не понесе одговорност“, наведува адвокатот.

Во својата објава, тој заклучува дека институциите мора да воспостават вистинско владеење на правото кое ќе важи еднакво за сите.

„Доколку тоа не се случи, нам ни останува да си помуабетиме на Фејсбук сами со себе и да се надеваме дека ќе дојдат подобри и рамноправни времиња“, порачува Туфегџиќ.